Jólaspenningur

Við komum til Íslands eldsnemma þann 18. des og förum aftur út 7. jan, sem þýðir að við stoppum í þrjár vikur á Klakanum. Ég er gjörsamlega að deyja úr spenningi, það er allt of langt síðan ég var síðast á Íslandi og ég sakna allra alveg rosalega mikið. Ég sé eiginlega hálf eftir því að hafa ekki keypt mér miða fyrr heim því að skólinn er búinn hjá mér 7. des (ég veit, alger lúxus!) en Pétur þarf að fara yfir próf sem er þann 14. þannig að hann kemst ekki fyrr. En ég þarf nú hvort sem er að klára stórt verkefni einhvertíma fyrir jól sem ég mun örugglega ekki ná að klára áður en skólinn er búinn svo að það verður líklega nóg að gera hjá mér. Svo þarf ég auðvitað að kaupa nokkrar jólagjafir, sem verða með allra rýrasta móti í ár...

Ég sá á mbl.is að það er ófærð í Reykjavík og dembir niður snjó og ég fékk næstum tár í augun. Veturinn virðist ætla að vera óvenju seint á ferðinni hér og það hefur ekki enn fryst. Ekki það að maður á örugglega eftir að vera kominn með ógeð á honum í lok apríl. Þetta er líka búið að vera vætusamasta ár í Montréal frá því að mælingar hófust mér til mikillar armæðu, t.d. rigndi allt of mikið þegar gestirnir voru hérna í ágúst af því að vanalega rignir mjög lítið hérna.

Úff, ég vona bara að þessar fjórar vikur líði á ljóshraða, tíminn líður hratt á gervihnattaöld, hraðar sérhvern dag, hraðar sérhvert kvöld... Ég hlakka svo til, ég hlakka alltaf svo til...