Mikið rosalega er ég löt að blogga. Ætla nú ekki að fara að lofa neinni bót og betrun í þeim málum heldur bara sjá hvað setur. Það versta er að við erum líka svo löt við að taka myndir þannig að ég á engar nýjar til að setja inn. Í hvert einasta skipti sem við förum á snjóbretti eða á gönguskíði þá hugsa ég, "o af hverju erum við ekki með myndavélina!" Það er stundum svo ótrúlega fallegt útsýni yfir vötn og skóga á skíðasvæðunum og svo er alltaf fallegt upp í Mont-Royal líka, sérstaklega þar sem nú er allt á kafi í snjó. Það er búið að vera ágætisveður í vetur, bara nýlega hafa komið mjög kaldir dagar (hátt í 20 stiga frost).

Það er svo sem ekki mikið að frétta héðan, við reynum bæði að læra af kappi en gengur ekki nógu hratt hjá mér að mínu mati. Ég er í einum kúrsi sem tekur allt of mikinn tíma frá mastersverkefninu. En þetta mjakast. Það er margt spennandi framundan hjá okkur. Við vorum að panta okkur ferð til Vesturstrandarinnar í lok mars/byrjun apríl þegar ég þarf að vera búin að skila fyrsta drafti af verkefninu. Ætlum að fljúga til Vancouver og stoppa þar í nokkra daga og keyra svo niður til San Francisco og stoppa í Seattle og Portland (borgin sem ég er að skrifa um) og kannski fleiri stöðum á leiðinni. Svo koma foreldrar hans Péturs í heimsókn í viku þegar mamma hans verður sextug og svo koma Krissa og Kári í lok maí og verða hérna þegar ég útskrifast (vonandi) þann 28.

Segi ekki meira í bili þar til ég get sett inn nýjar myndir.

D